تلخ وترش ۔۔۔۔۔۔۔۔۔۔۔۔۔۔۔۔۔۔۔۔ اسانغنی مشتاق رفیقی

 

٭این سی پی سربراہ شرد پوار اور سیاسی میدان میں اپنی حکمت عملی کے لئے مشہور پرشانت کشور کی پندرہ دنوں کے تیسری ملاقات، سیاسی قیاس آرائیاں تیز۔۔۔ ایک خبر

 جب تک مضبوط حکمت عملی کے ساتھ کوئی لائحہ عمل طے کر کے الیکشن نہیں لڑی جائیگی بی جے پی کو اقتدار سے بے دخل کرنا مشکل ہے۔ ویسے امید پہ دنیا قائم ہے، دیکھتے ہیں یہ سیاسی ملاقاتیں کیا رنگ لاتی ہیں۔

٭اتر پردیش کی عوام تبدیلی چاہتی ہے۔۔۔ سماج وادی پارٹی کے سربراہ اکھلیش یادو

بے شک عوام تبدیلی چاہتی ہیں، لیکن وہاں کے لیڈران ایسا نہیں چاہتے، اگر وہ ایسا چاہتے توعوام کے خواہشوں کااحترام کرتے ہوئے ایک مضبوط گٹھ بندھن ضرور تشکیل دیتے۔ پتہ نہیں انہیں عقل کب آئے گی، آئے گی بھی کہ نہیں۔

٭عمر گوتم اور جہانگیر عالم کی گرفتاریاں افسوسناک،ملک میں اقلیتوں کے خلاف میڈیا ٹرائل ایک خطرناک روش۔۔۔مسلم مبلغوں کی گرفتاری کے خلاف مسلم تنظیموں کے احتجاجی بیانات

صرف بیانات جاری کردینے سے کچھ نہیں ہوگا۔ ایک مضبوط محاذ قائم کر کے قانون کے دائرے میں رہتے ہوئے سیاسی دباؤ بناکر اور عدالتی کاروائی کے ذریعے جب تک ان کا منہ توڑ جواب نہیں دیا جائے گا یہاں ایسا ہی ہوتا رہے گا۔

٭مدھیہ پردیش، ایک میڈیکل کالج نے دستاویزوں کے کمرے کو آسیب زدہ بتاتے ہوئے آر ٹی آئی کا جواب دینے سے انکار کیا۔۔۔ ایک خبر

کالج منتظمین کو چاہئے کہ وہ وطن عزیز میں موجود کسی بھی نامور بابا سے رابطہ کر لیں، دستاویز وں کے کمرے کا آسیب کے ساتھ ساتھ آر ٹی آئی سے جواب مانگنے والوں سے بھی بہت اچھے طریقے چھٹکارا مل جائے گا۔

٭افغانستان میں امریکہ مکمل ناکام ہوگیا،اُس نے ہمیں شرمندگی اور تباہی کے سوا کچھ نہیں دیا۔۔۔ افضانستان کے سابق صدر حامد کرزئی

اب پچھتائے کیا ہوت جب چڑیا چگ گئیں کھیت

٭مرد کوئی روبوٹ نہیں، اگر عورت کپڑے کم پہنے گی تومردوں پر اس کا اثر تو پڑے گا۔۔۔ پاکستان کے وزیر اعظم عمران خان کا ایک بیان

جس معاشرے میں ایک بھر پور کپڑے پہنے ہوئے لڑکے کے ساتھ، خود اس کا استاد منہ کالا کرے، اُس معاشرے کے ایک ذمہ دار فرد کے اس بیان پر روئیں یا ہنسیں سمجھ میں نہیں آرہا ہے۔”ماروں گھٹنام پھوٹے آنکھ“ شاید ایسے ہی موقعے پر کہا جاتا ہے۔

٭کیا مدارس اسلامیہ علم و آگہی کا سر چشمہ ہیں۔۔۔ ایک سوال

 اس پر غالب کا ایک مشہور شعر عرض ہے، باقی آپ سمجھ دار ہیں

ہم کو معلوم ہے جنت کی حقیقت لیکن

دل کے خوش رکھنے کو غالبؔ یہ خیال اچھا ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔