تلخ و ترش ۔۔۔۔۔۔۔۔۔۔۔۔۔ اسانغنی مشتاق رفیقی،
٭کورونا سے گھبرانے کی ضرورت نہیں۔۔۔ دہلی کے وزیر اعلیٰ اروند کیجروال
بے شک،’آپ‘ کے ہوتے ہوئے کورونا سے گھبرانے کی کوئی ضرورت نہیں،کورونا خطرناک ہوسکتی ہے لیکن’آپ‘ سے زیادہ نہیں۔(دہلی فسادات کے پس منظر میں)
٭لداخ: محکمہ ریونیو کی نوکریوں سے اردو جاننے کی لازمی اہلیت کو ختم کرنے کے فیصلے پر تنازعہ۔۔۔ دی وائر
تنازعہ اس لئے کھڑا ہورہا ہے کہ اس فیصلے سے کچھ لوگوں کے پیٹ پر لات پڑرہی ہے، اگر مسئلہ صرف اردو زبان کا ہوتا تو شاید کسی کے کان میں جوں بھی نہ رینگتی۔
٭ چین کی سرکاری خبر رساں ایجنسی ژنہوا کے مطابق چین نے مصنوعی سورج بنالی جو حقیقی سورج سے پانچ گنا زیادہ گرم ہے۔۔۔ ایک عالمی خبر
اور ہم وشو گرو بننے کا خواب دیکھنے والے ابھی بھی سوریہ نمسکار میں ہی پھنسے ہوئے ہیں۔
٭اتر پردیش میں اہم بی جے پی رہنما اسمبلی انتخابات سے قبل پارٹی کیوں چھوڑ رہے ہیں؟۔۔۔ ایک سوال
یاتو اُنہیں سیٹ نہیں ملی ہوگی، یا اُنہوں نے جہاز کے ڈوبنے کو بھانپ لیا ہوگا، یا جوابدہی کے خوف سے مجبور ہوگئے ہونگے۔ ویسے اُن کا، اُن کے کسی بھی قول اور فعل کاکوئی اعتبار نہیں، یہ سب بے پیندے کے لوٹے ہیں، نتائج کے بعد کسی بھی طرف لڑھک سکتے ہیں۔
٭اترا کھنڈ کے ہری دوار میں ہوئے دھرم سنسد میں مبینہ طور نفرت پھیلانے والے بیانات دینے کے معاملے پر کاروائی کرتے ہوئے پولیس نے وسیم رضوی عرف جتیندر نارائن تیاگی کو گرفتار کیا۔۔۔ پی ٹی آئی
اتنے سارے ملزموں میں صرف وسیم رضوی عرف جتیندر نارائن تیاگی کی گرفتاری، لگتا ہے بات کچھ اور بھی ہے، ہائے افسوس!!! نہ خدا ہی ملا نہ وصال صنم، نہ ادھر کے رہے نہ اُدھر کے رہے۔
٭وزیر اعظم نریندر مودی کو”جان کا خطرہ“، اس سے بڑا کوئی جھوٹ نہیں ہوسکتا۔۔۔ پنجاب کانگریس کے ریاستی صدر نوجوت سنگھ سدھو
مودی جی کو جان کا خطرہ تھا یا نہیں، لیکن اس جھوٹ میں بہت جان ہے، بقول وسیم بریلوی
وہ جھوٹ بول رہا تھا بڑے سلیقے سے
میں اعتبار نہ کرتا تو اور کیا کرتا
٭ اتر پردیش اسمبلی انتخابات2022میں کیا ذات پات کی سیاست اہم کردار ادا کرے گی؟۔۔۔ ایک سوال
لگتا تو ایسا ہی ہے لیکن یقین سے ابھی کچھ کہا نہیں جاسکتا، اگر بی جے پی مذہب اور نام نہاد قوم پرستی کا اپنا کوئی پوشیدہ پتہ باہر نکال لے تو پورا کھیل بگڑ سکتا ہے۔
٭سری لنکا کے مسلمان: امتیازی سلوک اور ہراسانی کے باعث مسلمانوں کی زندگی اجیرن، تامل ٹائیگرز سے جنگ کے بعد کے دور میں اب مسلمان نئے دشمن۔۔۔ بی بی سی
کچھ دہائیوں سے ہر ملک کی یہی کہانی ہے۔ اسلاموفوبیا کی یہ خطرناک وبا پتہ نہیں کب تک دنیا کو اپنے شکنجے میں رکھے گی اور مسلم عوام ہر جگہ پریشان اور مصیبتیں جھیلتے رہیں گے۔
Comments
Post a Comment