تلخ و تُرش ۔۔۔۔۔۔۔۔۔۔۔۔۔۔۔۔۔۔۔۔۔ اسانغنی مشتاق احمد رفیقیؔ

٭مولانا ارشد مدنی نے آر ایس ایس کے سربراہ شری موہن بھاگوت سے دہلی میں ملاقات کی۔۔۔۔۔ ایک خبر

مولانا ارشد مدنی بھلے آدمی ہیں، ان کا مقصد اس ملاقات سے نیک ہی ہوگا، اللہ ان کے خلوص میں بر کت دے، لیکن ان کے بھگت جب دوسرے اسلامی جماعتوں کو گمراہ قرار دے کر اصلاح معاشرہ کے ضروری عنوان پر بھی ان جماعتوں سے وابستہ افراد کے ساتھ اسٹیج شئیر کرنے سے صاف انکار کردیتے ہیں تو بڑا تعجب ہوتا ہے۔ اعلیٰ سطح پر ہر ایک سے حتاکہ کھلے دشمنوں سے بھی مفاہمت کی کوششیں اور عوامی سطح پر خود اپنے صفوں میں انتشار پیدا کرانا، اگر یہی دین کی خدمت  ہے تو سیاست اور منافقت کسے کہتے ہیں؟

٭"ملک میں مسلمان پندرہ سولہ کروڑ، پھر بھی کیوں ڈرے ہوئے ہیں؟" ۔۔۔۔۔۔۔ سینئر آر ایس ایس لیڈر کرشن گوپال

اس لئے کہ وہ صرف مسلمان ہیں، مومن نہیں۔ اگر ان پندرہ سولہ کروڑ مسلمان میں پندرہ سولہ سو افراد بھی مومن ہوجائیں تو بات ہی کچھ اور ہوگی۔

٭مودی سرکار کے 100 دن سرمایہ کاروں کے لئے بھیانک خواب ثابت ہوئے، 14 کروڑ روپے ڈوبے۔۔۔۔۔۔۔ ایک خبر

مودی جی کو سرکار سونپنے میں سرمایہ دار طبقے کاہی بڑا ہاتھ رہا ہے۔ اس لئے اس پر غم زدہ ہونے کی کوئی ضرورت نہیں۔ یہ طبقہ مودی جی پر ایسے ہزاروں 14 کروڑروپئیے قربان کرسکتا ہے۔ لگے رہئیے مودی جی! ملک میں معاشی استحکام سے زیادہ کچھ لوگوں کو ان کے اوقات دکھانا بے حد ضروری ہے۔

٭مولانا محمود مدنی صاحب نے کشمیر کے سلسلے میں مودی سرکار کے  موقف کی کھل کر تائید کی۔۔۔۔۔ایک خبر

طلاق ثلاثہ بل پر حکومت کی کھل کر تائید کرنے والے عارف محمد خان صاحب کو بطور انعام کیرلا کی گورنری سے نوازا گیا، قصہ مختصر، باقی کچھ دنوں بعد اخباروں میں ملاحظہ کرلیں۔

٭ عراق: کربلا میں یوم عاشورہ پر بھگڈر، 31 کی موت، 100 زخمی، ہلاکتوں میں اضافے کا امکان۔۔۔۔۔۔۔ بی بی سی

جب دین، مذہب بن جائے گا تو ایسے حادثے اکثر رونما ہوتے رہیں گے، اس میں تعجب کی کوئی بات نہیں۔ 

٭ طالبان کے ساتھ افغانستان امن مذاکرہ کا خاتمہ ہو گیا۔۔۔۔۔۔۔ صدرامریکہ ڈونالڈ ٹرمپ

اس قسط وار ڈرامے کے آخری سین کے لئے اسکرپٹ شاید ابھی لکھا نہیں گیا ہے، کچھ اور دن نئے کرداروں کے ساتھ پرانے سین پھر سے دہرائے جائیں گے۔ تماشابین انتظار کریں۔

٭"گاندھی اور جناح نے ایک دوسرے کو سمجھا ہوتا تو ملک کی تاریخ کچھ اور ہوتی۔" ۔۔۔۔۔۔۔۔۔ سینئر صحافی اور قلمکار شیلاریڈی

یقیناً ، بر صغیر سوپر پاور ہوتا ۔ برا ہو نام نہاد مذہبی جنون کا جس نے ایک ہی قوم کو کئی حصوں میں بانٹ دیا اور یہ سلسلہ آج بھی جاری ہے۔

٭مہاراشٹرا اسمبلی انتخابات میں مجلس اتحاد المسلمین 74 سیٹوں پر اپنے امیدوار کھڑے کر رہی ہے۔۔۔۔ ایک خبر

بی جے پی کے جیت کو یقینی بنانے کے لئے اتنا تو کرنا ہی پڑے گا۔ ورنہ صاحب پارلیمنٹ میں مودی جی کو کیا منہ دکھائیں گے۔

٭ امریکی صدر ڈونلڈ ٹرمپ نے انڈیا اور پاکستان کے درمیان ایک مرتبہ پھر کشمیر کے مسئلے پر ثالثی کی پیشکش کرتے ہوئے کہا ہے کہ اگر دونوں ممالک چاہیں تو وہ مدد کے لیے تیار ہیں۔۔۔۔۔۔ بی بی سی

ایسا لگتا ہے بلیوں کی لڑائی اور بندر بانٹ کی کہانی پھر سے دہرائی جائے گی، بلیاں ہوشیار رہیں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔