تلخ و ترش ۔۔۔۔۔۔۔۔۔۔۔۔ اسانغنی مشتاق احمد رفیقیؔ

 

٭راہل گاندھی کی وزیر اعظم مودی اور پرینکا کی یوگی پر تنقید۔۔۔ ایک اخبار کی سرخی

اور یہ دونوں کر بھی کیا سکتے ہیں، نہ ان کی پارٹی ان کے قبضے میں ہے نہ عوام پر ان کا کوئی اثر و رسوخ باقی ہے، اب کوئی معجزہ ہی انہیں حکومت کے ایوانوں تک پہنچا سکتا ہے، تب تک انہی یہی کرتے رہنا ہے۔

٭ملک کے موجودہ منظر نامہ کو بدلنے کے لئے نوجوان طبقہ کا سیاست میں آنا ضروری۔۔۔ علی گڑھ مسلم یونیورسٹی کے سابق اسٹوڈینٹ لیڈر ڈاکٹر مشکور عثمانی

بے شک اس میں کوئی دو رائے نہیں، صرف سیاست ہی میں نے نہیں ہر میدان میں نوجوانوں کو آگے آنا ہے لیکن سب سے بڑا مسئلہ بوڑھی قیادتوں کا ہے جو ہر حال میں اپنی زندگی کی آخری سانسوں تک عہدوں اور کرسیوں سے چپکے رہنا چاہتے ہیں، انہیں اپنی اس ضد کے آگے قوم و ملت کی بھی کوئی پرواہ نہیں اور بیچارا نوجوان طبقہ دل میں لاکھوں کروڑوں خواب اور منصوبے لئے بڑوں کی عزت اور تکریم کو ملحوظ رکھتے ہوئے خاموش کھڑا ہے۔

٭بات خلا تک پہنچ گئی؟ امریکہ، برطانیہ کا روس پر خلا میں ہتھیار بھیجنے کا الزام۔۔۔ ایک عالمی خبر

یعنی دنیا اب اسپیس وار کے دہانے پر پہنچ چکی ہے اور ہو سکتا ہے بہت جلد ہمیں گھر بیٹھے ٹی وی اور انٹر نیٹ پر خوفناک تماشے دیکھنے کو ملیں۔

   ٭ایا صوفیہ استنبول میں 86 برس بعد جمعے کی پہلی نماز ادا کی گئی۔۔۔ ترکی سے ایک خبر

یعنی ارتغل دوم کی واپسی کا ٹرائلر شروع ہوچکا ہے۔ بقول اکبر الہ آبادی

اب ڈرامہ دکھائے گا کیا سین

پردہ اُٹھنے کی منتظر ہے نگاہ

٭ڈیموکریٹک پارٹی کے صدارتی امیدوار جو بائیڈن نے کہا ہے کہ اگر وہ صدر بنے تو روزمرہ کے معاملات پر امریکی مسلمانوں کی تجاویز اور خدشار کی پیش نظر رکھیں گے اور مسلمان آوازوں کو اپنی انتظامیہ میں شامل کریں گے۔۔۔ ایک خبر امریکہ سے

ہم کو معلوم ہے جنت کی حقیقت لیکن

دل کے خوش رکھنے کو غالب یہ خیال اچھا ہے